សារពីលោកប្រធានសមាគមអ្នកផ្គត់ផ្គង់ទឹកស្អាតកម្ពុជា

សូមស្វាគមន៍មកកាន់សមាគមអ្នកផ្គត់ផ្គង់ទឹកស្អាតកម្ពុជា (CWA)!

សមាគមអ្នកផ្គត់ផ្គង់ទឹកស្អាតកម្ពុជា (CWA) គឺជាសមាគមវិជ្ជាជីវៈក្នុងស្រុកមួយដែលមានជំនាញយ៉ាងទូលំទូលាយក្នុងវិស័យផ្គត់ផ្គង់ទឹកស្អាត ដែលគ្របដណ្តប់ទាំងទីក្រុង និងជនបទនៃប្រទេសកម្ពុជា។ អស់រយៈពេលជាងមួយទសវត្សរ៍មកនេះ សមាគមបានដើរតួយ៉ាងសំខាន់ក្នុងការគាំទ្រ និងការស្វែងរការគាំទ្រមតិសម្រាប់សមាជិករបស់ខ្លួន ដែលជាប្រតិបត្តិករផ្គត់ផ្គង់ទឹកស្អាតឯកជន នៅទូទាំងប្រទេស។ លើសពីនេះ សមាគមបានជំរុញកិច្ចសហប្រតិបត្តិការប្រកបដោយផលិតភាពជាមួយក្រសួងពាក់ព័ន្ធ ដៃគូអភិវឌ្ឍន៍ គ្រឹះស្ថានហិរញ្ញវត្ថុ និងអ្នកផ្គត់ផ្គង់សម្ភារ និងសេវាកម្មក្នុងវិស័យទឹកស្អាត។ គួរកត់សម្គាល់ផងដែរថា សមាគមត្រូវបានទទួលស្គាល់ថា ជាដៃគូដ៏មានសារៈសំខាន់របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍(ឧ.វ.ប.ន.) ក្នុងការឈានឱ្យសម្រេចបាននូវគោលការផ្គត់ផ្គង់ទឹកស្អាត ទឹកមានសុវត្ថិភាព និងថ្លៃសមរម្យដល់ប្រជាពលរដ្ឋកម្ពុជា។
ផែនការយុទ្ធសាស្រ្តសម្រាប់ឆ្នាំ២០២៥–២០២៣០ សមាគមប្តេជ្ញាពង្រឹងសមត្ថភាពស្ថាប័ន បង្កើនសេវាដែលផ្តោតលើសមាជិក ជំរុញការអនុវត្តការផ្គត់ផ្គង់ទឹកស្អាតប្រកបដោយបរិយាប័ន្ន និងទទួលខុសត្រូវ និងលើកស្ទួយ នវានុវត្តន៍ និងភាពវិជ្ជាជីវៈក្នុងវិស័យទឹកស្អាត។ គុណតម្លៃមូលដ្ឋានរបស់យើង—ផ្តោតលើសមាជិក ភាពជាដៃគូ, គណនេយ្យភាព ភាពវិជ្ជាជីវៈ និងចីរភាព— បង្ហាញអំពីការងារ និងភាពជាដៃគូរបស់យើង។
បេសកកម្មរបស់យើងគឺ គំាទ្រនិងលើកកម្ពស់ការជួយគ្នាទៅវិញទៅមករវាងអ្នកផ្គត់ផ្គង់ទឹកស្អាតកម្ពុជា បង្កើនចំណេះដឹង បចេ្ចកទេសស្របតាមស្តង់ដាទឹកស្អាតថ្នាក់ជាតិ និងជំរុញឱ្យមាននិរន្តរភាព និងការពង្រីកសេវាកម្មផ្គត់ផ្គង់ទឹកស្អាតនៅកម្ពុជា។ ឆ្នាំ ២០២៥, សមាគមមានសមាជិកសរុប ៣៤៣ ក្នុងនោះ មានសមាជិកអាជីពចំនួន ២៨៦ ស្ថានីយដែលបាននិងកំពុងប្រតិបត្តិការនៅ ២៣ រាជធានី/ខេត្ត និងសមាជិកគាំទ្រចំនួន ៥៧ ក្រុមហ៊ុនដែលបាននិងកំពុងផ្គត់ផ្គង់ទំនិញ និងសេវាកម្មក្នុងវិស័យទឹកស្អាត។
យើងសូមថ្លែងអំណរគុណយ៉ាងស្មោះស្ម័គ្រដល់សមាជិក និងដៃគូទាំងអស់សម្រាប់ការជឿទុកចិត្ត និងការសហការ។ រួមគ្នា យើងអាចធ្វើឱ្យវិស័យទឹកស្អាតរឹងមាំ មានចីរភាព និងធានាទឹកស្អាតសម្រាប់ប្រជាជនកម្ពុជាទាំងអស់។
ដោយក្ដីគោរពយ៉ាងស្មោះស្ម័គ្រ,
ឡេង ខៀវ
ប្រធានសមាគមអ្នកផ្គត់ផ្គង់ទឹកស្អាតកម្ពុជា