ព្រឹត្តិការណ៍នាពេលខាងមុខ

ក្រោមការឧបត្ថម្ភពីអង្គការ Water.org សមាគមបានសហការជាមួយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ (ឧ.វ.ប.ន.) ក្រសួងមហាផ្ទៃ និងរដ្ឋបាលខេត្តព្រៃវែង រៀបចំកិច្ចប្រជុំពិគ្រោះយោបល់ រវាងរដ្ឋបាលថ្នាក់ក្រោមជាតិ និងប្រតិបត្តិករផ្គត់ផ្គង់ទឹកស្អាតឯកជន អង្គការ និងដៃគូពាក់ព័ន្ធនានាក្នុងខេត្តព្រៃវែងស្តីពី«រួមគ្នាបង្កើនលទ្ធភាពទទួលបានសេវាទឹកស្អាត» ដើម្បីផ្សព្វផ្សាយអំពីលិខិតលេខ ៣៣១១ សជណ ចុះថ្ងៃទី១៤ ខែតុលា ឆ្នាំ២០២៥ ស្តីពី«ការជំរុញលើកកម្ពស់ និងបង្កើនលទ្ធភាពទទួលបានសេវាទឹកស្អាតនៅរដ្ឋបាលថ្នាក់ក្រោមជាតិ» ឱ្យកាន់តែមានប្រសិទ្ធភាព និងកំណត់អំពីបញ្ហាប្រឈមចម្បងៗ រិះរកវិធានការដោះស្រាយបញ្ហាប្រឈមទាំងនោះ តាមរយៈកិច្ចពិភាក្សាពិគ្រោះយោបល់ និងស្វែងរកឱកាសធ្វើការរួមគ្នាក្នុងការធានាឱ្យមានភាពប្រសើរឡើងក្នុងការផ្តល់សេវាទឹកស្អាតជូនប្រជាពលរដ្ឋ។

សម្រាប់សមាជិកជាប្រតិបត្តិករមកពីខេត្តកំពង់ចាម ព្រៃវែង ស្វាយរៀង ត្បូងឃ្មុំ ក្រចេះ រតនគិរី និងខេត្តមណ្ឌលគីរី យោងតាមផែនការងារស្នូលប្រចាំឆ្នាំនីមួយៗរបស់សមាគមអ្នកផ្គត់ផ្គង់ទឹកស្អាតកម្ពុជា (ស.ទ.ក) នឹងរៀបចំកិច្ចប្រជុំថ្នាក់តំបន់ ដើម្បីស្វែងយល់ពីសុខទុក្ខរបស់សមាជិក ពិសេសសមាជិកជាប្រតិបត្តិករផ្គត់ផ្គង់ទឹកស្អាត និងបង្កើនទំនាក់ទំនងជាមួយមន្ទីរ ឧវបន សមាជិកសមាគម និងដៃគូអភិវឌ្ឍន៍ ក៏ដូចជាការធ្វើបច្ចុប្បន្នភាពពីសមាគម ច្បាប់គតិយុត្តនានាទាក់ទងទៅនឹងវិស័យទឹកស្អាត និងការចែករំលែកចំណេះដឹង បទពិសោធន៍ ព័ត៌មាន និងបច្ចេកវិទ្យាថ្មីៗ។

យោងតាមលក្ខន្តិកៈ និងការងារស្នូលប្រចាំឆ្នាំនីមួយៗរបស់សមាគមអ្នកផ្គត់ផ្គង់ទឹកស្អាតកម្ពុជា (ស.ទ.ក) នឹងរៀបចំសន្និសីទ និងពិព័រណ៍ទឹករយៈពេលពីរថ្ងៃ ដែលមានគោលដៅគឺ «នវានុវត្តន៍ថ្ងៃនេះ ដំណោះស្រាយទឹកសម្រាប់ថ្ងៃស្អែក»។ កម្មវិធីសន្និសីទ និងពិព័រណ៍ទឹក ប្រារព្ធទៅដោយមានកិច្ចសហប្រតិបត្តិការជិតស្និទ្ធជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (ឧវបន) សមាគម និងដៃគូអភិវឌ្ឍន៍ផ្សេងទៀត។ សម្រាប់ឆ្នាំ២០២៦ សន្និសីទ និងពិព័រណ៍ទឹក លើកទី ៦ ចាប់ពីថ្ងៃចន្ទ-អង្គារ ទី២៦-២៧ ខែតុលា ឆ្នាំ២០២៦។